من روائع الشعر الشعبي .

يا قهرتي يا كيدي مدروك في الضمير *** متقلّق نتلاجى والقلب ما صبر

جاني داي خافي في الباطنه عسير *** كاتم سرّي ديمه للناس ما ظهر
لو نشكي باوجاعي ينغاضلي الحمير *** كل منهو يسمعني في القلب يندغر
صابر ليّ مدّه ما واجد النصير *** حالي عاد يسخّف ويذوب الصخر 
تفهمشي لو كانك يا صاحبي بصير *** نحكيلك لعلّ بالقول تعتبر
خايف لا تزّلبح ويطمنك غرير *** تزهاف وتدّربى لمنازل الغرر
يطرالك ما طرالي تتلاح في حفير *** يغدي بيه الشقدف ما تجيبله خبر
خيار ابنادم ناظر ما يكونش ضرير *** والعالي والواطي يحزيه بالنظر
يشرب كان الصافي من جمة الغدير *** مازال على الجّدّه في صحوة المطر
ويعاف النقّاعه المدّردره خمير *** ماها يدير السقيه ويخلّف الضّرر
واليغرس يتخيّر من جنسها شهير *** دقلايه وحرّايه وعليق للوثر
ويباري العمّاري في سومته حقير *** لا حضروا الكيّاله ما عاد ينذكر
شوف اغصان الكرمه من فوق تستنير *** ثمرتها مصيونه ما يلوطها كدر
ومن لوطه يلمسها من جايبه المرير *** والكعبه الملموسه تقراص تنحجر
اش جاب اللي راكب في دوكة المغير *** علسابق مدّوبه كيف لمحة البصر
واش جاب اللي راكب في يومها بعير *** علناقه حرّانه الغدّاد والنّحر
واش جاب صوت البومه لغريد بوبشير *** واش جاب صيد الغابه لثعالب الحفر
واش جاب اللي يكسب مالبينتو كثير *** في سرايات وجنّه علجالة البحر
واش جاب اللي فعشّه مشتاه في حجير *** شابع فيه الكبّي والشمس لا ظهر
واش جاب اللي يحكم في المحكمه وزير *** واش جاب اللي سارح وحوايجه صفر
يزيني من المعنى رجعت نستشير *** علكسر البلاّره كيفاش ينجبر
هذا قولي جبته من ضيقة الحضير *** امباقي لمر مقدّر ما فيشي حذر
انا حمد البرغوثي من صغرتي خبير *** لا نعمل دونيّه لا نحمل البغر
نستغفر من ذنبي ونتوب للقدير *** ربي يلطف بيّ في يوم ننحشر

للشاعر: البرغوثي