جديد الشاعر " الجيلاني المخ"

ليّام يا وخي ياسر كوتني ** و ما فرحتني ** سقيتها حنيني و هي ذبلتني
***
ليّام يا وخي كي تصير عوجه ** و تقلب الموجه ** تسقّم و ترفع شان العلوجه

و ليّام م البرد فكّت ثلوجه ** قال ذوبتني ** و الصّيف يبكي علاش بردتني
***
ليّام يا وخي تحصد و تدرس ** تزرع تنبّت تقلّع و تغرس ** و ليّام تزرس
و ليّام تلدغ تليّع و تقرص ** يا حاصرتني ** بلا حبال حاير عجب كتفتني
***
ليّام يا وخي تزرب تبطّي ** ترفع توطّي ** تفضح تلبّس تستر تغطّي
و ليّام مركب تغازل بشطّي ** ما ربحتني ** و لا رتحت منها و لا ريحتني
***
ليّام يا وخي رحلة قصيره ** و ليّام حيره ** و ليّام حلوة مرّة عسيره
تخزّن تفرّق تمد الذخيره ** و يوم حاربتني ** صانع مدالي و بيهم رمتني
***
ليّام يا وخي تفرح تضيّف ** تخرّف تربّع تشتّي تصيّف ** و ليّام تذبح تحلّل تجيّف
تكدّر تكيّف ** و كيف شيبتني ** حكاية جديدة و بيها بنتني
***
ليّام تقدر على كل حي ** تغدر البي ** و ليّام تظلم و تبعث الضّي
وراسك وخي ** ما خوفتني ** موالف مجرّب و هي عودتني
" الشاعر الجيلاني المخ "